اخطى راسي و اضرب ...

من طرف **foued** الأحد 1 فبراير - 0:33

يا سادة يا مادة يدلنا و يدلكم للخير و الشهادة.

يحكيو على شعب يطالب بالحرية و التعددية و التعبير صباح و عشية ...و كان ممكن من غير ما يتحمل أي مسؤولية.

تجي تسأل "المواطن" ... تي شبيها البلاد أمورها ما تعجبش ؟

هنا فما زوز احتمالات :

كانوا قفاف و يشوف قداموا كاميرا ... يقلك لا ... أمورنا عال العال ... و اش بينا خمسة و الخميس علينا

و كانو مازال عندوا شوية نزاهة يقلك ... الأمور ما تعجبش ... و يسميلك تلاثة من الناس المسؤولين عن ذلك.

هات نحللوا التوعية الأولى من العباد : هالنوعية , يا جماعة, عملت انجاز غير مسبوق : تعدات الكذب و فاتتوا من بعيد.

شنوة الكذب ... تي ماهو ايهام الاخر بحقيقة غير موجودة بش تنطلي عليه الحيلة. هالنوعية من العباد مشاو الى ابعد من هكة : هوما يعرفوا ان الطرف المقابل يعرف الحقيقة وصعيب اذا الكذب هنا لأنو مش بش تنطلي عليه الحيلة ... اش يعملوا ؟ يخرجوا كذبتهم و هوما يخزروا في عينين المكذوب عليه و يعرفوا الي المكذوب عليه يعرفهم كاذبين ...يعني يلزم الانسان بش يكون من هؤولاء, يلزموا مؤهلات كبيرة : أنو يحط في بلاصة وجهوا خيشة, أنه يبطل يخزر لروحوا في المراية, أنه يعفس على قلبه وقت الي يربي صغاروا و يعاود يكذب على هاك الملايكة و يقوللهم "ما تكذبوش مش باهي الكذب" و هو يعرف حق المعرفة أنه عرسه و داره و كرهبته جابهم بالتبلعيط متاعوا و يسلم هاك السان قداش يراوغ و تسلم هاك العيون ما أصحهم.

الفئة الثانية من" المواطنين" هاذوكم الي بكل عفوية تسألهم شنوة الي مش ماشي يقلك فلان هاردها ...هاك العايلة مافيا ماكلة الدنيا الكل ... و كي تجي للصحيح. تحطوا في المجتمع و تشوفوا كيفاش يتصرف ... يا قانون عافس عليه يا كود سوسيال مطفيه يا صف يحب يرسكي يا فيسك يحب يهرب منوا .... بالله كان جاء في بلاصة هاك العايلة زعمة بش يعمل خير منهم ؟ باهي احنا متفقين على نزاهة هالمواطن رغم أنه يلعب بذيله ... نتعداو هالنقطة ... ونرجعوه الى مكانو كمواطن ستاندار . باهي تقولوا في بالك امالا بالعايلة هذيكا اش مبدعة ؟ يقلك ايه ..هاو كلاونا في كذا في حومتنا ...تقولوا باهي ...علاش ما تتلمش مع جماعة حومتكم و ترفعوا بيهم قضية ... يقلك قضية "اييييييييو ا" تو يرشيو القاضي ...تقولوا تي اش يهمك ...المهم القضية و الجاست متاعك ... يقلك لا ياخويا اخطى راسي و اضرب ...

وهذية ثقافة المواطنة الغير مسؤولة الى تخلي المواطن مش مواطن لكن رعية ... و الي يعمل بيدوا ربي يزيدوا.

واخيرا نحب نعرج عالمواطنة الجبانة من خلال البيتيسيون الي تدور على الانترنات و وين العباد حاطة اسامي مستعارة رغم الي نص الوثيقة واضح و ما فماش علاش الانسان يخاف. هؤولاء يضروا بالبيتيسيون أكثر من الي بنفعوا و كان ما صححوش خير. تنجموا تعملوا عليها طلة هنا و كان تعديتوا مرحلة الرعية الى مرحلة المواطنة المسؤولية تنجموا , كانكم متفقين مع المفكرة و المحتوى,تصححوها.

وباش ننهي نقول الي جاب ربي المواطنين مش الكلهم في الفئة رقم واحد و الا الفئة رقم ثنين. وربي يهدي عبادوا و انستوا.

منقول