الشباب هو الحل موش المشكل

المكان قاعة درس في الجامعة التونسية

دخل الأستاذ قاعة الدرس فاذا بيه يلقى قدامو منظر غريب؛ تشكيلة من البورتابلوات محطوطة فوق الكراسي بجنب الطاولة متاعو؛ ما فهم شيء؛ زعمة هذي طريقة جديدة للتعبير عن الرأي؛ ولا مظاهرة بورتابلواتية ؟؟؟؟ لا يا سيدي الحكاية او ما فيها الطلبة تشرجي في بورتابلواتها في القسم؛ الأستاذ يحس في روحو شيّط
-الأستاذ؛ شنوة توة هذا معقول بربي ؟؟؟ تي أنا قلتلكم ممنوع استعمال البورتابل او لازم تسكروهم و ليتو تشرجوا فيهم جملة ؟؟؟؟
- طالبة؛ لا مسكّر موسيو البورتابل
- الأستاذ؛ بالله ؟؟؟ مسكّر ؟؟ آخي ما عنكمشي بريزات في دياركم ؟؟؟
او يا ريتو ما سأل هالسؤال مسكين؛ هيجة او ميجة في القسم او الطلبة الكل تعيّط؛ نحاووهم البريزات في المبيت الجامعي
الأستاذ؛ آه ؟؟ لا تفدلكوا
الطلبة؛ لا و الله موسيو ما عندناش بريزات في المبيت
الأستاذ؛ علاش ؟؟؟؟
الطلبة؛ قالوللنا اقتصاد في الطاقة
الأستاذ يضحك؛ آه اقتصاد في الطاقة؛ هيا مالاّ ميسالش شرجوا لهنا موش مشكلة؛ او بينو بين روحو ايقول ياولاّ احوال؛ ملاّ حالة هذي
يا بو رب طلبة قصوا عليهم الضو؛ طول عمري نسمع بيها هذي طفي عليه الضو حتى لن جيناها؛ طالب ما عندوش وين ايحل كاسات ولاّ رديون في حين انّو من المفروض راهو عندو انترنت او ويفي او التسهيلات الكل باش يقرى؛ او ثمة ناس مازالت شادة صحيح قالك الشباب هو الحل موش المشكل؛ شباب ما عندوش بريز في بيتو زعمة اينجم ايكون الحل ؟؟؟؟؟ توة تحب تقتصد في الطاقة تنحي البريزات على الطلبة ؟؟؟ و الله شيء ايضحك ههههههه؛ و الله خايف لا ايجي نهار ايولي لازم الطالب ايجيب شهادة فقر باش ايخلوه يستعمل التوالات في المبيت؛ ولاّ زعمة تو الطلبة يخرجوا نهار من النهارات في مظاهرة باش ايطالبوا ببريز؛ او اينجم ايكون الشعار مثلا ؛ يا طالب يا عزيز؛ لا دراسة بلا بريز؛ او وقتها ايولي البريز بالاكتاف او الرشوة؛ او تولي الطلبة اتدخل فيه كونترا للمبيت؛ يا ولاّ حكاية هذي ؛ لا عارف نضحك لا نبكي؛ طلبة قاتلها الشر موش لاقية باش تاكل او تشرب؛ او زيد يقرا او عارف روحو ماهوش باش يخدم؛ او فوق من هذا ايسكنوه في معتقل او يحبوه يفكر او ينتج؛ لا او ايجيك بهيم من البهايم في التلفزة متغشش كيفاش الشباب يحرق من تونس؛ تي قالك كل شيء متوفر لهنا؛ علاش يحرقوا ؟؟؟ واحد ايقلك مرضى او لاخر ايقلك ضعف في الشخصية او انسلاخ عن الأصل او الثقافة؛ انا نقول اللي نعم ياسيدي عندك حق؛ الشباب مريض؛ على خاطر أي واحد عندو شوية فهم او بعض غرامات من الانسانية ما ينجم كان ايكون مريض او شخصيتو مظطربة في هالبلاد ؛ البلاد اللي المواطن فيها ما عندوش الحق في بريز يحبوا الشباب يقعد فيها؛ شباب مقهور؛ شباب فد من الكذب او الوعود؛ شباب فهم او عرف اللي هذي ماهيش بلادو؛ ماهاش بلاد تعيش فيها لعباد؛ بلاد ما تعيش فيها كان الدينصورات؛
او ياطالب يا عزيز؛ ان شاء الله تحرق او تجيب بريز.

و الله عندك الحق أحنا في الفاك التوالات مسكرة متاع الأولاد و حتى متاع البنات و تبدى تقرا من ال 8 حتى 14 تولي تشد مربطك و تريض و الماء مافمش زادة كان بالفلوس في ال buvette و حتى كيف تقوله أعطيني شريبة ماء يقولك الماء مقصوص على خاطر يبيع في الماء المعدني و لازم تشري و كيف تبدا مفلس أقعد ميت بالعطش
و يمكنم تعرفو قداش من طالب يغيب على الدروس باش يروح للدار وإلا للمبيت و لا القهوة باش يشرب شربة ماء ولا يقضى حاجة و مبعد يعود يجري و ينسخ في الدروس
و ريقه شايح

الشباب هو الحل موش المشكل

الشباب هو الحل موش المشكل

رد: الشباب هو الحل موش المشكل