اوووف ملا جبري

الجهوية او التمييز بين الجهات في تونس: مانحكيش من الناحية الاقتصادية او السياسية اما نحكي من الناحية الاجتماعية...
نقصد شنوة معنتها كلمة "جهة" عند فئة معينة من المجتمع؟؟
لاحظت انه فمة برشة ناس عندهم الجهوية هي التمييز بين الناس حست الجهات اللي ينتمولها او اللي يعيشوا فيها!!!

في تونس عنا كلمة جبري تسمعها اكثر من كلمة السلام عليكم: هذا جبري والاخرى قعرة وهذاكه جندوبي والاخر ساحلي..، اوووووف جماعة الجنوب........
تي الحصيلو وين تمشي تلقى تمييز بين الجهات..حتى في الخدمة ديمة اولاد البلاد يخدموا قبل البراني حتى كيف يبدى هو كفء اكثر منهم ومؤهلاتو خير!!!

وانتم تميزوا بين الجهات وتفضلوا اولاد جهة على جهة؟؟؟
شكون فيكم مرة كان ضحية للظاهرة هذي؟؟
وشنوة رايكم فيها؟

أنا الربيع اللي فات نعملو في تربص متاع مدربين مصايف فمة زوز درجات
الدرجة الأولى التكويني يقعدو 7 أيام
و الدرجة الثانية إختصاص يقعدو 5 أيام
عاد أنا تابع الإختصاص كملو الخمسة الأيام قالونا اللي يحب يكمل النهارين الأخرين في القيروان يخلص 5 دينارات الناس الكل دفعت بحكم الجو و الأصحاب مع العلم أن التربص هذا فيه جميع الولايات تقريبا
وقعت مشكلة في الليل متاع تفتيل الحاصل مشى واحد قود للمدير كيف الذري الصغير مع العلم عمره أكثر من 18 سنة
المدير قرر ان جماعة الإختصاص الكل يروحو عاد ماني أنا راقد و مافي بالي بشيء
جاء مكون الصباح وقال جماعة الإختصاص الكل يروحو
ثرت أنا من النوم الشعر مفرعس و عين مسكرة و عين محلولة وقتله أنا راني خلصت
قال ما يسالش روح
عاد وقفت مالسرير و قتله نعم أنا مانيش مروح و أعمل أش تحب
خزرلي و قالي منين أنت قتله مل الجمهورية التونسية
من أي جهة قتله من قفصة
هز روحه ومشى للمدير وقاله هو فمة واحد قفصي قاعد بحذاهم يسمع فيهم
عاد المدير هذا قال قفصي أش باش تعمله
جاء قالي عاد أك الطفل هزيت روحي ومشيت للمدير هيا كان باش تولي فيها جهويات هاني لام جماعة قفصة ومروح و أقعد فيه الستاج
و القفاصة ما كانوش مل العاكسين طلعو طول يلمو في دبشهم
ولى المدير يتسحلل و أحنا عاد عاملين فيها حب عزيز وكذا
المهم أحنا في تونس معانس عنصرية الأبيض والأسود عنا عنصرية الجهويات

هيا أنده

عندما نتخلص من فكر القبيلة سنتخلص من الجهوية

الجهوية ظاهرة منتشرة عنا برشة كان في الشمال ولا الجنوب ولا في العاصمة
واكثر بلاصة نلقوا فيها الجهوية هي الستاد
بلحق قداش نكرهها المصطلحات اللي يستعملوا فيها:سفق، سواحلية،kGB،08،جبري،جريدي...
بالنسبة ليا انا عندي صحابي من مختلف الجهات وماعنديش معاهم حتى مشكلة الباهي والخايب في كل بلاصة!!

enti
7alit lbeb lni9achet mamenha 7ata feyda khater lklem maya3tich natija
la + la- bel3aks tzid t9awi le7sses bel he9d a7na k chabeb hadafna
narta9ou bba3thna b ghath enathar 3la antimaatna el jihawiya wel fikriya

انظن انو تحليل الظواهر السيئة و محاولة فهمها و القضاء عليها حتى هو من سبل النهوض بالشباب...

شكرا اسماء على طرح الموضوع ،
انا باش ناخذ مثال واحد و نحكي فيه من جميع النواحي : الاقتصادية و السياسية و الاجتماعية .. باش ناخذ مثال الحوض المنجمي اللي هو حديث الساعة و اللي هو على جميع الالسنة ..

مسألة الحوض المنجمي هذا تطرح إشكاليّة فيما يخصّ المثال متاع التنمية الجهويّة إلّي نتبّعوا فيه من عام الإستقلال لليوم، وهو مثال تنموي حاطط قدّامو أهداف ماهيش قابلة للتحقيق أساسا على خاطر أقوى من إمكانيّاتنا الإقتصاديّة والماليّة.

الأهداف الكبرى متاع التنمية الجهويّة متاعنا كانت بالأساس تحقيق تنمية متوازنة بين الجهات، يعني شدّينا الخريطة، قسّمناها خطوط خطوط وقلنا هاذي ولايات، ومن بعد قلنا لازم نعملو تنمية متوازنة ما بين أبراج البطّيخة هاذي، يعني ما بين الولايات. المنهج هذا علاوة على أنّو إعتباطي شويّة وخذا بالأساس بتقسيم البلاد على أساس مخلّفات قبليّة وعروشيّة متاع مجتمع ما قبل الإستعمار، فإنّو إقتصاديّا مثال فاشل من بدايته، تقول إنتي علاش؟ باهي هاو باش نقوللك علاش: على خاطر أوّلا بلادنا ما عندهاش فلوس متلتلة من القاز أو البترول أو الذهب باش تبدى تستثمر فيها في الجهات الكلّ بنفس الدرجة من العدل والإنصاف، وبالتالي فإنّه معقول ياسر أنّك كيف تبدى عندك شويّة فلوس تحطّها في البلاصة إلّي باش تربّحك أكثر وبالتالي فإنّك ما عندك حتّى سبب منطقي مثلا باش تحطّ معمل متاع خياطة يخدم للتصدير في بلاصة كيف أم العرايس على خاطرك كيف باش تصدّر لازمك تكون في أقرب بلاصة للبرط باش ما تزيدش تثقّل على روحك تكاليف النقل وبالتالي سلعتك تولّي أغلى وتقعدلك في الرقبة. تقولولي نعملو برط في أم العرايس؟ باهي نعملو، أما قبل هذا لازم تعاودو تقراو درس الجغرافيا متاع هاك العام وقتها المعلّمة تتكلّم وإنتوما تشوّشوا.

يحبّ يقول هنا أنّه عادي باش الإستثمار يمشي للبلايص إلّي يلقى فيها مردوديّة أعلى، وهذا ماهوش عيب. العيب هو أنّك تحطّ أهداف تعرف أنّك ما تنجّمش تحققها وتقعد من بعد في الحشمة مع المواطنين إلّي يستنّاو في التنمية ياخي لا جاتم تنمية لجهاتهم ولا صارت تنمية بصفة كافية في البقايع الأخرى من البلاد بدرجة تسمح بإستيعاب عدد أكبر من البطّالة من مختلف جهات البلاد.

الإشكال الأوّل هذا يطرح إعادة النظر في مثال التنمية الجهويّة والتفكير على مستوى وطني أوّلا، يعني موش مشكل كان نركّزو الإستثمارات في أماكن أكثر من غيرها ونخلقوا مدن كبرى (كبرى بالحق موش بالبلّوط كيما إلّي عندنا) تكون قادرة من حيث البنية الأساسيّة والحجم الإقتصادي أنّها تستوعب الطاقات المهمّشة في البلاد الكلّ، وبالطبيعة الإستيعاب هذا يتمّ مبدئيّا على أساس الكفاءة والحاجة متاع المؤسّسات، موش على أساس أنا ولد فلان أو مولود في الدشرة إلّي تولد فيها سي فلان

الإشكال الثاني هو أنّ التنمية القائمة على المؤسّسات العموميّة، أو ما يسمّيه عشّاق تشي غيفارا بـ"إمتلاك الدولة لوسائل الإنتاج"، هو مثال تنموي ما ينجّم يكون كان فاشل..؟ الناس شدّت في النتائج ونسات السبب، بحيث إلّي هذا يندب كيفاش كلّ مدير يجي يجيب معاه جماعتو ويخدّم أولاد بلادو وتدخل فيها المحسوبيّة والفساد والسرقة وينسى سؤال آخر: ياخي الدولة مجعولة بالحق حسب رأيكم باش تستخرج فسفاط من مناجم؟؟؟؟ سامحوني شويّة أما وينهم الناس إلّي نهار وطولو يندّدوا بالخوصصة متاع المؤسّسات العموميّة؟ آشبيهم ما شافوش لهنا كيفاش عدم الخوصصة متاع قطاع إنتاجي يهزّك بالضرورة لوضعيّات داخلة في حيط متاع أكتاف وناس تاخذ في شهاري وما تخدم في شيء، وجعالة واستغلال نفوذ والهم الأزرق الكل؟؟ ياخي تعرفوش علاش إنتوما من أصلو الناس جات من سيدي بوزيد ومن صفاقس باش تفكّ خدم متاع ناس قفاصة؟؟ ياخي على الشطوط الزرقاء إلّي فيها قفصة هاذي وإلاّ على طقسها الجميل ونسيمها العليل وإلاّ على هيفاء وهبي ونانسي عجرم وإليسا إلّي يدوروا في شوارعها باش واحد بعقلو يخلّي بلادو ويمشي يخدم في قفصة؟؟ شركة الفسفاط هاذي يا سيدي ما عنديش كلمة أخرى نعبّرلكم عليها أحسن من أنّها ميزاب متاع فلوس على ذمّة العموم، الشاوش فيها يخدم ربع ساعة في الجمعة ويخلص تسع مياة دينار بخلاف آش ينجّم يتفتف، وما نحكيش على الإطارات.. يعني فلوس البيليك ماشية في الهواء قال شنوّة باش نعملوا شويّة توازن بين الجهات وتنمية جهويّة والقفاصة ينقّصوا من البلادة والمشاكل. إيه توّة إنتي كيف تجي تعملّي ميزاب متاع فلوس كيف هكّة وإلّي يجي يغرف، ماهو عادي جدّا باش الناس تولّي تسيّب بلدانها وتفكّ في بلاصتها في قفصة وإلاّ حتّى في برج الخضراء وكلّ قدير وقدرو: هذا ولد خو رئيس مصلحة "الفُسْ"، الآخر ولد أخت كاهية مدير إدارة "الفاط"، وهكذا دواليك حتى لين أولاد البلاد خرجوا منها بالواحد بالواحد ورزق البيليك ولاّت شايخة فيه أولاد بلاد المدير القديم والمدير إلّي قبلو، وصار ما صار...

الإشكال الثالث: هي مسألة التركيبة القبليّة والعروشيّة للمجتمع وقلّة الوعي بمفهوم من المفروض أنّه محوري في إطار نظام الجمهوريّة، ألا وهو مفهوم المواطنة. الإنتماء القبلي والجهوي والعروشي في حدّ ذاته ينجّم يكون مقبول، ولكن المشكل هو لمّا يولّي الإنتماء هذا يمثّل إحساس أقوى من الإحساس بالمواطنة. ولهنا انّجم نقول أنّو "شويّة من الحنّة وشويّة من رطابة اليدين"، يعني أنّه الإنتماء هذا كان متجذّر في عقليّاتنا من قبل حتى ما تجي الدولة "الحديثة"، والمحاولات البورقيبيّة لمقاومة الجهويّات وزرع فكرة القوميّة التونسيّة أو الأمّة التونسيّة كبديل للشيء هذا ما نجحتش للأسف، أو لعلّها نجحت في وقتها وما لقاتش آشكون يكمّلها، أو لعلّها نجحت ومن بعد جاء آشكون كبّلها سعدها، ولكن زادة حسب رأيي، وهذا الجزء يقابل "رطابة اليدين" في المثل المذكور، نشوف أنّه عدم تكريس مفهوم المواطنة بصفة تجعل المواطن "يحبّ" فكرة أنّه مواطن، عندو حقوق المواطن الكاملة وما أدراك، وبالتالي ينسى حتّى شويّة أنّه صفاقسي أو جندوبي أو ساحلي أو زلاصي أو عيّاري أو فرشيشي، ويتذكّر خاصّة أنّه مواطن تونسي. وبالتالي فإنّ غياب هالمرجعيّة القويّة متاع المواطنة كممارسة يوميّة، موش كخطابات نظريّة، خلاّت الناس تتشبّث بهاك الإنتماء الضيّق وبالطبيعة في الحالة هاذي تولّي العائلة تتعدّى قبل "البراينيّة" والأقربون أولى بالمعروف وهذا قريبـي وهذا ولد بلادي والآخر من هاك البلاصة خايب.. والثقافة هاذي كيف تتنشر فإنّه عادي جدّا أنّك تلقاها زادة في مستوى الطبقة السياسيّة وفي مختلف مراكز المسؤوليّة (هاذيكا اللّي ما نحبّهاش أنا) بما أنّ المسهول ماهو إلاّ واحد من أولاد المجتمع هذا، وبالتالي هو زادة عندو عايلة تجي قبل كلّ شيء، وبعدها عرش وقبيلة وأولاد بلادو وأولاد الجهة متاعو، ومن بعد نشوفوا آش يفضل للبقيّة، وبالتالي نفس الشيء باش تلقاه في الإدارة، في المعاملات، في الكورة، وزيد الماء زيد الدقيق حتى لين تخلى على رأس الجميع بقدرة المانع الستّار..

الإشكال الرابع كيف العباد تحسّ، بل وتعرف، أنّها الناس الكلّ ماهيش متساوية قدّام القانون، وكيف تحسّ، بل وتعرف، أنّها برشة ناس قاعدة تستعمل في انتمائها الجهوي أو العائلي أو القبلي باش تتمتّع بإمتيازات على غيرها، كيف تحسّ، بل وتعرف، أنّها الكفاءة ما عندها ما تقضي قدّام المحاباة، يعني في الحالة هاذي، وقتها تحسّ (من غير ما تعرف المرّة هاذي ههههه) أنّها البلاد إلّي إنتي عايش فيها ما عادش تتعامل معاك كمواطن بل كشخص ينتمي أوما ينتميش لعرش معيّن أو لقبيلة معيّنة، وفي الحالة هاذي، كيف نخرجوا على منطق المواطنة، إلّي هو بالأساس يقوم على المساواة في الحقوق والواجبات، فإنّ ردّة الفعل العروشيّة والقبليّة متاع الناس إلّي يحسّوا أنفسهم في وضعيّة إقصاء من المجموعة تصبح طبيعيّة، وتزيد في حدّتها، بل وفي شرعيّتها، الفوارق إلّي تسبّبت فيها خيارات تنمويّة حولة كيما حكيتلكم في الأوّل.

ومن غير ما تزيدو تلزّوني باش نقول كلام ماهوش من المفروض أنّي نقولو .. هيّا يزّي توّة فيه الف بركة اللي قلناه ..و ما اشربش الشاي اشرب قازوزة ههههههه ..

بالنسبة لموضوع الجهوية و الي هي ضاهرة متفشية بشكل غريب في البلايص الكل و خاصة في الشمال
بالنسبة للخدم و الكتاف و الي حكى عليها البعض نرى انو المشاكل هاذي مازالت كان في السلك العمومي ولا في
semi-étatique

اما بالنسبة للسلك الخاص ذراعك يا علاف على خاطر وعو بانو كيدخل ولد عمو ولا ولد خالو و ما يكونوش
compétants
هما الخاسرين في النازلة اما المشكلة في هالجماعة بتاعنا الي بايعينها بلفتة و الي راقدين على كاسة
cpg
و مشينا حنا في العفس

Tout simplement 5ater ettounsi m3a9ed et il se croit supérieur, les tunisois se croient mieux que swe7lia ou sfaxia ou autres, et nweblia ou binzartia se croient 5ir min jnedna les sfaxois se croient mieux que gfassa... Bref tout ça pour dire que l'acccent et le lieu où on vie ne reflète en aucun cas notre personnalité, nos idées et notre valeur, ama winnou elli yefhim.

pourquoi mettre des frontières tunisiennse entre nous les tunisiens wallah chey y3a9ad !!!

Minouche كتب:
enti 7alit lbeb lni9achet mamenha 7ata feyda khater lklem maya3tich natija la + la- bel3aks tzid t9awi le7sses bel he9d a7na k chabeb hadafna narta9ou bba3thna b ghath enathar 3la antimaatna el jihawiya wel fikriya

ya minouche hatta ana hatheka wen 7abbit noussel, ya5i mahou nerta9ou beb3adna b ghath enathar 3la entima2atna eljihawia kan ki na9thou 3la regionalisme
bel3aks manich nchaja3 fih syndrome hatha ana thiddou.

3lach te7kou 3la eljihawiya w ka2anha 7aja khayba?bel3aks eljihawiya welwatania ezzoz 3endhom nafs elma3ani w nafs elahdaf alachi elwa7ed betbi3tah ymil lebladah w awled bledah (eljihawiya) w ymil lelwatan mta3ah(elwatania).welli ma3endachi eljihawiya ma3netha ma3endachi elwatania!