حديث فلاحي

علاش البنات الباهين فيسع ما يجيهم المكتوب ؟؟؟ و علاش ما تقعد كان التاعبة و أختها ؟؟ و علاش البنات اللي عرفتهم في فترات سابقة لكلّهم عرّسوا ؟؟؟ زعمة علاش؟؟ حكاية زهر ؟؟ نواصي و عتب ؟ شهيلي يطيّب لغيرو ؟؟ علاش ما تولّي الطفلة عزيزة و غالية الا مبعد ما يسمع بيها باش تعرّس؟؟ علاش ما تقدملهاش مالأول ؟؟ وينهي شجاعتو و رجوليتو ؟؟ علاش ما يفيق كان بعد فوات الأوان؟؟ عقم هجومي ؟؟ انعدام ثقة ؟؟؟ مشكلة مادية ؟؟ نفسانية ؟؟
وقتاش ينوب ربي؟ وقتاش تتفرهد لومور ؟؟ لوقتاش نبقى نستنى ؟؟ لوقتاش نبقى نكوّن ؟ فاش نكوّن ؟؟ و لاشكون نكوّن ؟؟ وقتاش توفى رحلة التكوين؟؟
ملا كلمة... تكوين... قداش كرهتها الكلمة ... تكوين ... ماهو كوّن على روحك ...تكوين ..فلان يكوّن في مستقبلو ... تكوين...مهني .... تكوين ... قطاعي ... مكوّنون ... مكوّنات ... المجتمع المدني ... ههههه

الحاصيلو العالم الكل يكوّن و يتكوّن و ياخذ و يقرأ الفاتحة و يشري في الصياغة و يعرّس و يخطب و يشري في الموبيليا و يجيب في الصغار ...أفواجا أفواجا ... اطارات المستقبل و ياخذو في الكراهب ... يحوّسو - يلوّثو في البيئة ... يصبّو في ايسونس 1250... و انا نكوّن...

- علاش انتي عندك كرهبة ؟؟
-لا عندي برمي
- عندك دار ؟؟
- لا
- عندكش تراب, أرض رزق ملك ورثة قديمة؟؟
- لا
- طبيب ؟ مهندس؟ استاذ في الجامعة ؟ مسؤول في شركة ؟؟
-ههههههه
- امّالا باش دازز على الدنيا؟
- عندي بلوق
- ؟؟؟
- بلوق على البيئة و حماية المحيط هههههههه
- شنية ؟؟
- !!
- هههههه برّة حل كتاب على روحك
- كتاب البخلاء؟؟
- ما قعدت قوي كان في البلادة و التمقعير ..

و كيما يقول لومير ,
«Si certains sont en mal d'image, d'autres sont en mal d'efficacité, »

قولة كبيرة ياسر و عميقة ياسر و فيها معاني فلسفية ..اما نجّم نلخّصها في كليمتين خفاف نظاف : " الفائدة في الرجولية ..."

يا فؤاد هون عليك حناني

ماهو انت لازمك تكون...كون لين يوصل عمرك 35 و اللي تلمهم اسرفهم في شهر...المادام تحب على صياغة ذهب و علاش لا خاتم الخطبة فيه ديامنة مش غالي ب 2 ملاين بركا
و العرس لازمو في صالة...الصالة بش تقعد فيها ساعة ولا ساعتين ب800 دينار...يا بوقلب كيف تحسب الدقيقة في الصالة ب6 الاف

هاي عاد لازمك فرقة ليلة العرس هذه كل قدير و قدرو

الموضة الجديدة لازمك طباخ...يا حسرة منين كانو يتلمو النساء يطيبولك كسكسي يعمل 66 كيف
قالك في تونس يكرو في كرهبة رويس رويس بش تروح بالعرسان سومها مش غالي شهرية معلم بركا

يا صاحبي الواحد تقولش عليه بش يبعث مشروع

اما الصراحة و راهو كيف ما يقولو الصراحة راحة بنيات تو يستاهلو...راهي دلولة امها و باباها حتى الطياب ما تعرفش اطيب...وليش يلزم اطيب هي????

تو يتعشوا البرى ما يغلى علاها شيئ

و يا فؤاد انت عقلية ناس قبل يا ولدي قالو الفايدة في الرجولية

اش من رجولية يا صاحبي...اعطيني بو يسئل على الرجولية.... كلها اش عندك و اش جبت و اش تعمل..تقولش عليه بحث و كان سلكتها تخرج بخطية 10 ملاين بركا مصروف العرس

راهي لازم العرس يبقوا يحكو عليه العباد

المفيد اللي يحب يعرس توا عليه بصبري

حقا صبري مات الله يرحموا

و راهو الكل حديث فلاحي كيف ما قال فؤاد

معناها اسمع و فلت

هايل برشة موضوعك يا فؤاد وردك يا سفيان يعمل الكيف
ههههههههه

يا خويا فؤاد والله لحديث حلو الشي الي ولا معاه صناعي موش فلاحي المهم نحب نقلك حويجة بركه والله حكاية العرس حكاية فارغة وحكاية التكوين افرغ يا ولدي عاش ما كسب مات ما خلى خيرلوش بنادم شايخ حواسة على لبيسه سمحه على شوية ما شعير يدوخ بيهم روحو والكلو يفوت وحد ما يموت اما باش الواحد يعيش كوشة ويخلي رويحتوا ناقصه بارشة حوايج زعمه زعمه يكون الكلو حديث لا هنا لا غادي

يا ابا داني حناني توا الناس الكل تحب تعرس و انت تقلهم حكاية فارغة...وليت خايف عليك ليجيك هجوم معاكس من الاعضاء العزاب مساكين حطمتلهم امالهم

اما ماء الشعير اسموه عنا في الدشرة متعنا اسموه زيت المعدة..امالا نقلك رد بالك لا يزلق قلبك نهار من نهارات راهو الزيت ازلق يا صاحبي

و قتها عاد عليك بصبري بالحق...ماو في بالك الواحد يتبعث نهارة القيامة على الحالة اللي مات علاها

تصور يا صاحبي توقف قدام الرسول و انت ريحتك ناتنة بالشراب...ترضى زعمة هكا

و كيف ما يقولو و ختامها مسك اهدي سلامي و اشواكي اه نقصد اشواقي الى كل متتبعي تونس 7....

هيا نخليكم على خير و ربي ازوجنا احنا العزاب و اطيحنا بما خير منا

يعطيك الصحة يا نزار حتى كان ظاهرلي عندك منها برشة والله ضحكتني
والرد متاعك حتى هو يبرّد القلب
وفطنة صاحبنا سفيان بالمرصاد وردّو على خونا اللي يتغزل بّميّة الشعير زادة حتى هي هايلة

ياخي حاب تعرس يافؤاد
أشنيه بتذاكر من ورانا

foued كتب:بيني و بينك حاب اما هالتكوين وقفلي كيف الشوكة في حلقي

rabbi ysahellek ya foued

بما انها الرمانة تفركت وتجبد العرس والتكوين (موش Formation ) منين باش نكون من القعدة في الدار والا بالدورة والهملة في الشوارع
التكوين يجي بالفلوس والفلوس تجي بالخدمة والخدمة ما ثماش وحتى كان توجدت يلزمك تنزحلها وبرا واش باش يخلص الكرا والما و الضو و الترونسبور و هلما جر من المصاريف وفي النهاية تلقى روحك ما كونتش و حتى كان عملت تفتوفة تحتك تمشي قبل ما تفكر باش تعرس لأنك ساعتها باش تصطدم بالطلبات التعجيزية والشروط اللي ماتحدش