دعوة للصلح

gafsa_Lagare كتب:

بسم الله والحمد لله والصلاة والسلام على نبيّنا خير الأنام وتحيّة لقرّاء الموضوع الكرام منهم واللئام، من الكافرين وعبدة الأصنام، وأهل الكتاب والدائنين بالبوذيّة والإسلام. أمّا بعد، فيا أيتها الأخوات وأيّها الإخوان، يا أهلي وأهل بلادي جبرستان، من بنزرت لبن قردان مرورا بالقيروان، وأنتم يا من تعوّدتم المرور بهذا العنوان وكلّ من أبحر معكم بلى ربّان من الإنس والجان على الشبكة العنكبوتيّة، فحطّ الرحال على هذه المخطوطة الرقميّة، وعاصر معنا تجربة كانت بالتأكيد ثريّة وضعنا فيها مع ثلّة من خيرة شباب إفريقيّة الركائز الأوّليّة لما أصبح يعرف بعالم المنتديات التونسيّة.

لا أخفي عليكم يا أصدقاء أنّ للمنتديات طعم أضحى أقرب إلى الزوال، وأنّها أصبحت مرتعا للهمّال وفاضي الأشغال، وقد شهدتم كيف أنّ الحوار لم يعد حول الأفكار، وأنّ المواضيع لم تعد هي الإطار، وأنّ المكان أصبح للتفوريخ والشجار، بين المحافظين الجدد وبين فريق من الكفّار، كما كنّا لاحظنا جميعا كيف أنّ عددا من أصحاب المواضيع القيّمة والمشهورة، قرّروا باش يخطفوا الدورة، وتركوا نسمة مرتعا للجبورة، أصحاب الأفكار العورة، ومستويات "تعرضلي في الدورة "، وهذا لا محالة وضع تعيس، لا يرضاه إلاّ الخسيس، بل أنّه لا يرضي العلماني ولا الخوانجي ولا حتى البوليس، ذلك أنّ غياب الحوار يجلب للجميع العار، فتنظر إلينا الأمم بإحتقار، وتحدث القطيعة بين هذا وذاك التيّار، ويعتكف أوّلهما في الجامع والثاني في البار، في حين أنّ الجميع هاززهم نفس التيّار، متاع نفس الواد الهرهار، وتكون لنا مزبلة التاريخ في الإنتظار، بمشيئة الواحد القهّار.

لهذا وفي هذا الإطار، حبّيت نتوجّه للوخيّان الكلّ بدعوة أخيرة، قبل ما يعدم الفضاء وتكون للناس الكلّ صفعة كبيرة، ونترجّاهم باش يرجعوا للحوار ويتعلّموا يقبلوا بإختلاف الأفكار. حبيت نقوللكم يا ناس، يزّي من التعصّب ومن الكره للأشخاص، راهي لا ورثة بيناتنا ولا سانية ولا بالاص، ولهذا يرحم والديكم ووالدينا، أخطاونا من البلادة وعفّوا علينا، خلّي الناس تعبّر راهي مخنوقة، وخلّي الصوابع تكتب هالأسطر المسروقة، فيقوا يهديكم الهادي الستّار، وخلّيو الناس تقدّم آش عندها من أفكار، ولانا طالبين منكم تصفيق ولا تبندير ، ولا شكر ولا تقدير، حاولوا بركة باش تقيلونا من التجوبير، والتنسنيس على خصوصيّات الناس والتشهير،و سيرتو التمقعير رانا موجودين في الرقعة هاذي بالسيف علينا وعليكم، وما عندنا من خيار غير باش تحملونا ونحملوكم. حتى حدّ ماهو مجبور باش يقرى الموضوع متاع فلانة أو فلان، إذا هي أو هو ما يعجباش كأفكار أو كإنسان، وما يمنعك حدّ من التعبير، إذا كان تحاول تنأى بنفسك عن مرتبة الحمير، وتناقش الموضوع بحكمة وتدبير، أو حتى تعمل مواضيعك الخاصّة، وتكتب على علوم الفلك والصاروخ والغوّاصة، وتفيد الناس بما يستحق البحث والدراسة.. أما أنّك تجاوب بالسبّ المجاني وبالتشهير بأعراض الناس، فهذا عمل ما يعملو كان الوسواس الخناس، أوالحثالة البهناس إلّي ما يحبّ يمشي كان في الخنادق تحت الكيّاس.

أقول قولي هذا وأدعو الله لي ولكم بالهداية، وأنا أعلم وأنتم تعلمون أنّي أطول هذا القوم لسانا كما سبق وأن شهدتموه عيانا، وأنّي أقدرهم على الشتيمة إذا ما إستمرّ بنو حليمة في عادتهم القديمة، فها أنا أدعوكم لنسيان ما كان قد تولّد من عداوات سخيفة، وإلى العودة إلى النقاشات اللطيفة، التي تعنى بالمضمون ولا تحيد إلى المواجهات العنيفة التي لم تعد تليق حتى بالحيوانات الأليفة. هيّا سيدي بوس خوك وصلّي عالنبي وما عادش تعاود صنعتك..

ملاحظة : " كثيرا من نخطئ ونعطي لصفة الجبري أو الجبورة صبغة جهويّة بما يرادف النزوح أو الجاي من وراء البلايك، في حين ننسى أنّ التجوبير هو بالأساس طريقة في الحياة ونظرة جبريّة للوجود، وهي موجودة ومنتشرة عند الكثير من أبناء هذا الوطن العزيز مهما كانت إنتماءاتهم الجهويّة أو الطبقيّة " .

ABADA Sami كتب:

شبيكم على ياسر هو كاتب دعوة للصلح مش جاي يعارك فيكم ولا يسب فيكم كل واحد عندو طرقتو بش يعبر. علاش تفهموا كان الحاجة الخايبة.. ياسر من أقدم لعباد فالمنتدى واللي دخل أمس وجا يحكي وياخذ في مواقف من غير حتى يفهم شنية لحكاية ولا حتى كيفاش كان الوضع. إنشاء الله يرجع كل شي كيف مكان عليه قبل وكلامي هذا مش موجة لشخص محدد أما للناس كل وكما يقول الدعاس دمتم دائماً متألقين..

hayfa كتب:هو نقل الموضوع من غير ما يثبت في محتواه
و رغبته فقط المصالحة

ABADA Sami كتب:

شبيكم على ياسر هو كاتب دعوة للصلح مش جاي يعارك فيكم ولا يسب فيكم

foued كتب:

ABADA Sami كتب:

شبيكم على ياسر هو كاتب دعوة للصلح مش جاي يعارك فيكم ولا يسب فيكم

يا سامي انا ما ريت في دعوة الصلح هاذي كان العنوان !!

اما الباقي .. بدون تعليق :

[ندعوك للتسجيل في المنتدى أو التعريف بنفسك لمعاينة هذه الصورة]

kilani كتب:نقل الموضوع يا إمبراطورة يتطلب الإنتباه والفهم العميق وليس إتيان حركة إعتباطية قد تجعل من أصداقائه ألد أعدائه،أنا لا أتكلم عن نفسي والجميع يعرف أنى إنتحيت جهة الحياد في كل شيء وقد مرت مشاكل كثيرة شهدت معظمها ومنها من أتى وتهجم ولكن لم يناطح حدها حد هذا الموضوع٠٠٠
لذا أرى أنه
إما أن يقدم كاتب الموضوع أو ناقله تفسيرا لما خطّ أو فليعتذر فورا وأمام الجميع إن كان حسن النية
و السّلام
هذا رأيي ولا ألزم به أحدا

بوعلام كتب:

ABADA Sami كتب:

شبيكم على ياسر هو كاتب دعوة للصلح مش جاي يعارك فيكم ولا يسب فيكم كل واحد عندو طرقتو بش يعبر. علاش تفهموا كان الحاجة الخايبة.. ياسر من أقدم لعباد فالمنتدى واللي دخل أمس وجا يحكي وياخذ في مواقف من غير حتى يفهم شنية لحكاية ولا حتى كيفاش كان الوضع. إنشاء الله يرجع كل شي كيف مكان عليه قبل وكلامي هذا مش موجة لشخص محدد أما للناس كل وكما يقول الدعاس دمتم دائماً متألقين..

فسرلنا يا خوي العزيز
خلينا نفهمو

ABADA Sami كتب:

.. ياسر من أقدم لعباد فالمنتدى ..