عصفور في حفرة !!!

الحمد لله
نبدا كالعادة بالصلاة والسلام على طيب الانفاس
قالك ثم جماعة جو متعديين لقوا عصفور طايح في حفرة غارقة وضيقة وما نجمش هاك العصيفير يخرج منها على خاطر ما يقدش يحل جوانحو ، كذلك ما ينجمش العبد يدخل ايدو باش يخرجو واحتارو الجماعة في تخريج العصيفير حتى أنو واحد قال هذه كيما يقولوها ناس بكري "وحلة المنجل في القلة" .
هوما هكاكا وثم وليد صغير جاء متعدي من هاك البلاصة شافهم كيفاش دايرين ومقوقشين قال خليني نعمل عليهم طلة وفعلا دخل في وسطهم وشاف العصيفير كيفاش حالته حالة قاللهم الطفل ها العصيفير تخريجو ساهل ياسر من الحفرة ، ابعدوا شوي خليني انخرجو ، وبدا هاك الوليد يجيب في الرمل ويصب بالشوي بالشوي والحفرة تتعبى بالشوي بالشوي والعصيفير يطلع بالشوي بالشوي لين خرج العصيفير وطار وطار الشر كيما يقولو ناس بكري .
وكيما يقولها كبارنا راهو العرف شباب وراهو يتوجد في النهر اللي ما يتوجدش في البحر.
ومحل شاهدنا راهو ما هوش ديمة وين ثمة جماعة ثمة البركة وثمة المعرفة على خاطر قداش من بلاد ومن قرية ومن امدينة ضال جاهلة ويدخللها واحد عالم يخرجهم من الجهل وربي يبقي علينا وعليكم الستر والصلاة والسلام على طيب الانفاس.