حكاية دوختني

السلام عليكم و رحمة الله و بركاته

خير بداية كيف ما اقولو نبدوها بالصلاة على النبي

عندي حكاية مدوختني عندي 3 أشهر ملي روحت آخر مرة إلى قفصة

يا سيادي لحكاية و ما فيها إنو مرواحتي جات مع الأربعين متاع جدي الله يرحمو و انعموا

خوكم هبطت 3 أيام الأولى فرحانين بي ماكل شارب راقد مدلل ...

قعدت النهار الرابع نحكي أنا و أمي ... قاتلي ولدي راهو نهار السبت الأربعين متاع جدك الله يرحمو ....

قلتلها يا ميمتي مش لربعين متعوا إتجي بالإثنين ....

قاتلي صحيح لكن ولدي الناس إلي تعرف قالوا هو عندو 2 أولاد ذكورة ياخذ عليه كل ولد نهار اتولي ما عادش نهارت الأربعين يعملوا لربعين اتولي نهارت ال-38

خوكم كيف ما تعرفوني في المنتدى .... نسال ديمة على العلة و بنت العلة و الطبيب باش مات

شديت عاد أمي ... غسورتها بالسؤالات

قلتلها يا ميمتي الحنانة

توا بربي هل 40 هذي في اناهو شرع جيت .... ياخي فيها حديث و علاش الأربعين مش العشرين ولا الخمسين

و علاش كان الأولاد الذكورة ياخذوا عليه كل واحد ليلة .. علاش الأناثي لا

و تصور واحد عندو 50 ولد ذكر ... اش يعملوا يبقى الميت مسال في 10 أيام

عاد أميمتي مرا على قدها... قاتلي وليدي هكا قالوا الناس إلي تعرف

قلتلها بربي سمهملي هذم خليني نمشي نسالهم .... قاتلي ما نعرفش لكن الناس إلي تعرف قالوا هكا

كيف عرفت أمي مش بش نلقى عندها الصحيح ....
بقيت نفكر أشكٌون نسال .... بالطبيعة ما نجمش نسال بابا على خاطروا كان بش نسالو بش ناكل على راسي ... الله غالب هكا تربينا ما نسئلوش الوالد و ما ناقشوشو

عاد نعرف واحد من جماعة هاك الطلبة ... هاك إلي اجو يقروا على الميت ......
مشيت نلقى ولدو سالتو لكن الله غالب ما يعرفش حتى هو .... و زيد زربتني المرواحة ..رجعت إلى ألمانيا قبل الأربعين و ما لقيتش أشكٌون إجاوبني

و نسيت لحكاية مع الوقت .... اليوم تفكرتها قلت خليني نسال في المنتدى هو تبارك الله يلم برشة شرائح من قفصة خايفش نلقى الجواب

سامحوني يا سيادي كان طولت عليكم و هذم سؤالاتي و ان شاء الله نلقى الجواب

توا بربي هل 40 هذي في اناهو شرع جيت .... ياخي فيها حديث و علاش الأربعين مش العشرين ولا الخمسين

و علاش كان الأولاد الذكورة ياخذوا عليه كل واحد ليلة .. علاش الأناثي لا

و تصور واحد عندو 50 ولد ذكر ... اش يعملوا يبقى الميت مسال في 10 أيام

السلام عليكم ورحمة الله وبركاته
يا سي سفيان خليني نطّفل على ها الجواب
الحكاية وما فيها خرافة من الخرافات المتوارثة بين شريحة كبيرة في المجتمع.

وعندي مصدر موثوق أن اليهود حينما كانوا يسكنون معنا في حارة اليهود وهي في كل مدينة قديمة تقريبا من المدن العربية،
كانوا محافظين على بعض التقاليدن وبما أنهم يخالطون المسلمين أخذ عنهم الجهلة كثيرا من هذه التقاليد، ونسوا سنن الإسلام:
هذه بعض ما ورث المسلمون من اليهود:
التمائم كالودعة وقرون الحيوانات وقرن الفلفل حاشاكم والحوتة وصورة العين والخُمسة، والتطير من العدد 5 رغم أن الصلاة خمسة..
ومن العادات الأربعينية ووضع خبزة بالزيت عند رأس الميت في الليل قبل دفنه، والتهليل والتكبير بصوت جماعي مرتفع عند تشييع الجنائز، ورش الماء وراء المسافر، وكثيرا لم أذكرها الآن لعلها تأتي في مناسبات أخرى...

والأغرب من هذا أنك حين تريد تغيير هذا المنكر يقف لك أجهل الناس بالدين ليصفك بشتى الأوصاف والأغرب من هذا أيضا أنّ الأكثرية من الحاضرين يساندونه،
ولا حول ولا قوة إلا بالله