من لاغوس .. حول ..

ايا السلام عليكم
اشنوا غيب يا قط العب يا فار ههههه انا مشيت منا و انتم شبعتو فيا قرضة هههه
مايسالش خوذو راحتكم ماعندي كان انتم ندلل عليكم راهو ..
هاني الاخت هند سبقتني في الموضوع اما تمشوش يجد عليكم اللي حكاتو عليا هاك الماسطة ؟ راني نعرفها تكرهني و تتسبب عليا على اقل حاجة ههه

ايا خليني نهدر معاكم شويا و نحكيلكم على الرحلة متاعي من تونس للاغوس..
بون اسباب المشية هي الخبزة هانا نتبعو فيها من بلاصة لبلاصة وين تمشي الخبزة احنا شادين جرتها .. هاك تشوفو وين وصلتني انا ههه اما مانيش مسيبها قلتلها تمشيش للسما السابعة .. انا وراك ..
الرحلة متاعي كانت على مرحلتين : تونس القاهرة كمرحلة اولى ثم اسكال في القاهرة 4 ساعات ثم القاهرة لاغوس كمرحلة ثانية ..



الانطلاق كان من مطار تونس مع الخطوط المصرية الساعة نص الليل بالضبط عمك الشيفور عمل مارش اريار ... پريميار ... سانكيام و خرج .. ومية و كان في السما ..
الحق مالقيتش مشاكل في مطار تونس .. المشكل الوحيد اللي لقيتو حكاية الباقاج خاطر انا مسموحلي باش نهز معايا كان 20 كيلو و انا سطل البسيسة اللي حضرتهولي امي و كردونة البسكوي وحدهم يفوتو 30 كيلو هذا خلاف الحوايج الاخرى اللي هازها معايا .. بزهري نلقى برشة توانسة ماشيين يخدمو في لاغوس وليت قسمت دبشي معاهم .. كل واحد عطيتو شويا .. واحد جاه صباط و واحد جاه سروال .. كل واحد و قسمو ههه اما الماكلة بصراحة طلعتهم معايا .. سطل البسيسة و كردونة البسكوي و كردونة "دقلة متاع السنا" ههه حطيتهم في صاك و طلعتهم معايا باش يبقو على عيني تحت المراقبة .. باش حتى لا قدر الله ضاع الدبش على الاقل يبقالي ماندمق وناكل .. كل شيء ولا اللعب بالماكلة هههه
الحاصيلو الطيارة شدت الثنية و بيني و بينكم اول مرة نركب في الطيارة هههه هذاكا علاش مشيت فرحان .. اول مرة نشوف البحيرة و قنطرة رادس من السماء ..
الرحلة شدت 3ساعات .. الارتفاع : 1400م السرعة : 850 كم/س الطائرة نوع 320 airbus
اول منظر شفتو و بالفعل ابهرني انك تشوف الاسكندرية من السماء .. منظر موش نرمال بالكل خاصة الكورنيش اللي بكلو ضو احمر و خط مستقيم تقولش مسطرة .
الحاصيلو وصلنا على بركة الله لمطار القاهرة الدولي في الساعة 3 صباحا اللي هيا 4 بتوقيت مصر .... بصراحة مطار كبير يفصل 5 من مطار تونس و منظم و شيء كبير ..



جيت داخل عمكم الديواني قالي عدي الصاك على السكانار .. نشوف في الراجل جبد الصاك على شيرة و حلو و عينك ما تشوف الا النور.. جبد سطل البسيسة و قالي "ايه دا ؟" قتلو "بسيسة" قالي "ايه ؟؟؟" قتلو " ياولدي بسيسة شهر كامل الوالدة تاعبة تحضر فيها .... طحينة يا باشا طحينة " قالي " ممنوع انك تدخل ماكولات لمصر .. ازاي ديوانة تونس خلاتك تعدي ؟" ....... " قالي " صبح !!" قتلو " صباح الفل يا باشا" قالي " لا .. صبح .. اديني حاجة عشان اسيبك تعدي" قتلو " راني ماصرفتش فلوس عندي كان فلوس تونسية ماتمشيش هنا في مصر .. و حليت كردونة البسكوي و عطيتو شويا بسكوي على كعبات دقلة و قتلو "الدقلة دي بتاع تونس و مازالت فال موش حتأدر تغمض عينيك" و هزيت صاكي و تعديت ..

المطار تبارك الله معبي بالحجاج الي مروحين و كانو يزورو في بيت الله .. صليت معاهم الصبح في جامع غادي في المطار و قعدت نستنى في الوقت ..
الاسكال دامت 4 ساعات .. كيف قرب الوقت مشيت للبوابة باش نخرج منها للطيارة .. كيف العادة سي الديواني (واحد اوخر هذا موش لول) عدى الصاك على السكانار و حلو و والمرة هاذي جبد كردونة البسكوي و قالي "فيه ايه هنا ؟؟" ياخي انا المرة هاذي فهمت اللعبة ماني حصلت قبل عاد .. و نزيد نحصل توا ياسر هههه وليت فهمت روحي وحدي و " صبحت" عليه بكعبات بسكوي و زدت "مسيت" عليه بكعبات دقلة و قصدت ربي للطيارة ..
الساعة 8 و 20 دقيقة كان الانطلاق على طائرة بوينج 737 .. بيني و بينكم تعشيت و ضربت النوم ما فقت بروحي كان كي دخلنا للاغوس .. الرحلة من القاهرة للاغوس دامت تقريبا 5 ساعات و نصف ..
الحاصيلو مطار لاغوس .. مطار قفصة اكبر منو ..



طبعت في الباسبور و ندرا اشنوا قاتلي المرا اللي طبعتلي بالانقليزية وانا صدقوني لتوا لاني عارف حتى اشنوا قاتلي خاطرني خوكم كعبة لا انقليزية .. حبست بيا في " what's your name " و قعدت فم و في نيجيريا اللغة الرئيسية متاعهم الانقليزية ..
خرجت من المطار دارو بيا النيجيرية تسمع منهم كان جملتين : "give me money" و "give me something" نلقى صاحبي يستنى فيا مشينا قصدنا ربي للدار..

اكثر حاجتين عجبوني في لاغوس هوما :
فمة نوع متاع زواحف يشبه للورل اما هو مزين اسمو بالفرنسية iguane هذا يا سيدي تلقاه في البلايص الكل في الشارع .. في الشجر .. في الديار .. فوق الحيوط .. اما ماهوش مخطر .. الصغار كيف يشوفو العبد يهربو و الكبار ما يهربوش هههه رقعة ..




و زادا التاكسيات بخلاف الكراهب فمة زادا الدراجات النارية تاكسي بوبلاصة .. معناها كيف تبدا ماشي لبلاصة وحدك ..تهز دراجة نارية تاكسي ههههه تركب ورا السائق و ديما تمشي هههه

بون باش نحكيلكم شويا على الطقس في لاغوس .. لاغوس مدينة استوائية فيها 2 فصول .. شتاء و صيف .. و الفصول ازوز سخان و ممطرين .. توا الطقس هنا شتا و الحرارة 30 درجة .. تخيلو شتاء وانا توا في مريول خلعة و شورط و حال كليماتيزيز ههههه
التربة متاعها حمرا و غنية و تنبت كل شيء ..
بالنسبة للغلال معبية بالبانان والاناناس والمنقا ..
الخبز مافماش و الكوش مافما حتى كوشة .. عندهم خبز يعملوه في الديار كيما الملاوي اما ارق بياسر ... هانو اللي يحب يولي ملياردار يجي يحل كوشة في نيجيريا هههههه

الحمد لله على سلامة الوصول يا سي فؤاد
لكن شنو الي بش تعمل غادي
ستاج
تكوين
تعاون فني
؟؟؟؟؟؟؟
و قداش بش تقعد
؟؟؟؟؟؟

هيا برا نقولو زيارة منيارة
وبصراحة عندك موهبة في جعل المتتبع لتغطيتك الاحترافية للرحلة يواصل قراءة ما سردت من احداث
اسلوب شيّق يجعلني افكر في التوسّط لك لتكون مراسل صحفي هناك وتوطّن غادي
[ندعوك للتسجيل في المنتدى أو التعريف بنفسك لمعاينة هذه الصورة]

رد بالك يا فؤاد من هذه النفايات
لاغوس مدينة النفايات الالكترونية

ماشاء الله تباارك الله عليك فؤاد

سرد الاحداث في قمة من الروعه

الحمدلله على سلامتك

وان شاء الله تتفكرنا بكل ما هو جديد

hayfa كتب:الحمد لله على سلامة الوصول يا سي فؤاد
لكن شنو الي بش تعمل غادي
ستاج
تكوين
تعاون فني
؟؟؟؟؟؟؟
و قداش بش تقعد
؟؟؟؟؟؟

الله يسلمك اخت هيفاء
والله الحكاية معقدة شويا .. الحاصيلو انا قبل كنت نخدم في دليس (معمل الحليب اللي في سليمان) ومبعد كيف نجحت في مناظرة متاع وزارة الصحة دخلت نخدم في الصحة .. عندي صاحبي خدمت معاه في دليس ولا توا يخدم في كانديا في فرنسا .. ماهو يعرف اللي عندي خبرة كلمني و قالي راهم باش يعملو معمل متاع حليب و عصير في لاغوس .. (ديجا اول معمل حليب باش يتعمل في نيجيريا) ..قالي كان تحب تجي تخدم معانا في لاغوس .. بيني و بينكم نلقى العرض مغري و الشهرية اكثر اغراء .. برا قلت نعمل على ربي و نزدم .. ماعندي ماخاسر و كان كاتبلي باش نموت .. الموت علينا حق صوا في لاغوس ولا في المتلوي.. وليت قبلت العرض .. ولى صاحبي بعثلي كونترا .. هزيتو للتعاون الفني و سويت وضعيتي معاهم على اساس اني وقت اللي نرجع .. نرجع لخدمتي و ماتضيعش عليا .. و مشيت للسفارة فيزت .. و قصدت ربي ..
بالنسبة للمدة .. حاليا باش نقعد عامين و مانيش عارف مبعد نزيد ولا يزي ..

العنيد كتب:هيا برا نقولو زيارة منيارة
وبصراحة عندك موهبة في جعل المتتبع لتغطيتك الاحترافية للرحلة يواصل قراءة ما سردت من احداث
اسلوب شيّق يجعلني افكر في التوسّط لك لتكون مراسل صحفي هناك وتوطّن غادي
[ندعوك للتسجيل في المنتدى أو التعريف بنفسك لمعاينة هذه الصورة]

رد بالك يا فؤاد من هذه النفايات
لاغوس مدينة النفايات الالكترونية

الله يخليك اخ العنيد ..
و الله حكاية التلوث صحيح موجودة في الماء .. بالنسبة لمياه الشرب يجيبولنا في المياه المعدنية المستوردة و مياه الاستعمال المنزلي كيما الغسيل و الدوش عاملين centrale de traitement d'eau

action كتب:ماشاء الله تباارك الله عليك فؤاد

سرد الاحداث في قمة من الروعه

الحمدلله على سلامتك

وان شاء الله تتفكرنا بكل ما هو جديد

الله يسلمك اخ اكسيون
ان شاء الله باش نكون ديما حاضر معاكم ماداما ال وي -في موجودة

ربي اوفقك خويا فؤاد رد بالك فقط من التجمعات النفلونزا

ورد بالك كيف كيف تقعد وحدك هنالك الكثير من الجرائم ....

الاصدقاء لا .....

خويا فؤاد حس بينا شوية أحنا في كل رحلة
ذهاب ولا إياب الديوانة يديرو فينا حالة والمصروف اللي رايحين بيه ولا جايين بيه
يدوه ويخلونا
وساعات رانا ملاح إذا جبنا حاجة في يدينا
ربي يوفقك و إن شاء الله ترفع راسك ورأس والديك
ڨول أأأمين .

[ندعوك للتسجيل في المنتدى أو التعريف بنفسك لمعاينة هذه الصورة]

اb sara7a la méthode d'écriture mahich attirante w déjà makamaltech 9rit sama7ni c'est mon point de vue

بنت الجنوب كتب:اb sara7a la méthode d'écriture mahich attirante w déjà makamaltech 9rit sama7ni c'est mon point de vue

والله أنا نشوف التشويق في أسلوبه وهو شيء رائع
أول مشاركة ليك بديتها كيم هكة
ياخوفي من الجا ا ا ا ا اي ....!!!

[ندعوك للتسجيل في المنتدى أو التعريف بنفسك لمعاينة هذه الصورة]

foued كتب:

b.kalija كتب:خويا فؤاد حس بينا شوية أحنا في كل رحلة
ذهاب ولا إياب الديوانة يديرو فينا حالة والمصروف اللي رايحين بيه ولا جايين بيه
يدوه ويخلونا
وساعات رانا ملاح إذا جبنا حاجة في يدينا
ربي يوفقك و إن شاء الله ترفع راسك ورأس والديك
ڨول أأأمين .

[ندعوك للتسجيل في المنتدى أو التعريف بنفسك لمعاينة هذه الصورة]

مرحبا بيك اخت خديجة و ربي يهديهم جماعة الديوانة ديما عاملين فينا مع احترامي للاخ العنيد
ان شاء الله ربي يوفقني في الخدمة و ربي يبارك فيك اخت خديجة

موش مشكل اخ فؤاد
للمعلومة فقط :كان سبب دخول العنيد لهذا السلك ما عاناه هو نفسه منهم مما دعاه للدخول للديوانة
وعلى العموم اصابع يديك موش كيف كيف بقطع النظر عن كونه زوجي

لا حرج في ذلك
تحيّاتي لك فؤاد

حصيلو محلاه منتدانا!!
ربّي معاك يا فؤاد
أسلوب كتابتك شدني برشة

الله معك يا اخي ورد بالك من مايكل وانشاء تعودالينا بكل سلام

رد بالك من مايكل وانشاء الله تعود بخير وترشيح تونس لكاس العالم وارجو منك اخي ان تسلم على كانو وابوجا الى اللقاءءءءءءءءءءءءءءءءءءءءءءءءءءءءءءءءءء

صبح صبح يا عم مايكل اه يا عم فؤاد [ندعوك للتسجيل في المنتدى أو التعريف بنفسك لمعاينة هذه الصورة]