الثورة التونسية

أرسل إلينا صديق الصفحة محمد نابلي هذه المساهمة :

برجولية يا أدمين ، اليوم فدّيت فدّة مزمّرة بصراحة
الصباح كنت جاي لشارع بورقيبة من جهة شارع محمد الخامس باش نسترجع ذكريات يوم 14جانفي 2011 ، نسمع في حس ما فهمتوش وحضبة جاية من المنقالة كلاللي فهمتو هو انو فما صوت طبل ...زدت قربت ما فهمتهاش متاع شكون في الأول وهي تنادي أوفياء أوفياء لدماء الشهداء .. ويقولوا يا شهيد يا شهيد على دربك لن نحيد ....انا عَمّال نقرب ونشوف في رايات مكتوب عليها نداء تونس وهازين شعارات تحكي على الشهيد والتنمية وجرحى الثورة والتطرف والإرهاب .

بصراحة مخي وقف وتبلوكيت ما فهمتش آش نعمل : نبكي والا نضحك ؟؟
الكلاب هاذم اللي قامت ضدهم الثورة وضد حزبهم القديم التجمع وضد رئيسهم الهارب باش يوليوا بين عشية وضحاها ثوريين بعد ما كانوا يسبوا في الثورة ويمجدوا في المخلوع وحرمه المصون وابنه المدلّل ؟؟نساو لما كانوا يقولولنا راهو بن علي يحب يخدم البلاد لكن الشعب هو اللي بطال وكسول ويحب يقبض شهرية من غير خدمة ؟؟؟
نساو خدمة الصبة الي وصّلت عشرات الآلاف إلى السجون والمنافي ؟؟؟ والا بالكشي نساو القوادة بالمصلّين حتى وهوما في ديارهم ؟؟

قلت نسايس روحي لا نبلبزها ونشوف الوجوه ، انا قربت ، ونلقى عالدخلة يا ربي الأعمال عليك واحد أسمر مبطبط أقسم بالله العظيم كان يخدم في لجنة التنسيق متاع التجمع ماللي كانت في باب سويقة .

ونلقى جماعة من لجنة التنسيق بباردو كانوا مرة شراو من عندي سلعة وأقسم برب الوجود انهم قلبوني في فلوسي ، ونلقى مرا قلاّبة شادة في يدها علم داء تونس وهي تتفيسخ على سيدها راشد الغنوشي ، تذكرت انها من سنييييين ، طلبت مني خدمة باش نخدمهالها وبعثتلي واحد تجمعي مقطّر باش يستلمها مني وقاللي توا مدام فلانة تخلصك الجمعة هاذي ماكسيموم ، وتعدات الجمعة الأولى والثانية والثالثة وما قبضت شي ، طلبتو بالتليفون ، قاللي راهي فلانة ما عطاتني شي وامشيلها توا تخلصك ، قلتلو وين مقر جمعيتها والا وين نلقاها ؟؟ قاللي في مقر التجمع شارع محمد الخامس .
أيا مشيت لغادي وانا نصطاد فيها من بيرو لبيرو ، وأخيرا لقيتها في واحد منهم حاطة ساق على ساق قريب عورتها المغلظة تبان وهي شادة سبسي = سيقارو مارلبورو تتكيف فيه تقولش عليها حاجة ما نحبش نقولها ، قلتلها راني فلان الفلاني اللي يستنى في فلوسو ، جاوبتني قالتلي : وُه ياخي لتوا ما جاتك فلوسك ؟؟ بعثتهالك مع فلان .
قلتلها ما وصلني شيء وما قبضت شيء وكان تحب كلمو .
قالتلي راني عطيتو ثمن 10 قطايع كاش
قلتلها يا مدام انا راني خدمت 20 موش 10
تعجبت وقالت لكن انا ما وصلوني كان 10
قلتلها كلمو ...
قعدت تطلب فيه وهو ما يهزش حتى لين تحصلت عليه فقاللها راني ما خذيت منو كان 10 وجبتلو فلوسو
آش نقوللكم ؟؟؟ برجولية دخت في صحة الرقعة متاعهم والقلبة عيني عينك ... ردّوني سلّمت 10 فقط وفوق هذا قبضت حقهم ...
من نهارتها وانا نحاول نتحصل عليه وشيء ومبعد فهمت انو عرّس الجمعة هاذيكا وانو جهز دارو بالفلوس اللي قلبني فيها
ومشى تعبي وجهدي حرام وعداوها علي قلابة التجمع هاذم .
وقلت كان باش نكلمها ونسبّها لما تلمّ علي اللي يسوى واللي ما يسواش وترصيلي في الإنعاش لا قدر الله وخاصة لما يلقاوني عامل لحية ويعرفوني تابع النهضة .

بعدها هي لقيت واحد تجمعي قرا معايا في الكلية وكان يعسّ علينا شكون يصلي وشكون ما يصليش وشكون من الأخوات تصلّي معانا وشكون اللي ترجع الحجاب على راسها بعد ما تفوت باب الكلية ، ويهز التقرير لواحد من التجمع عندو مكتب في مقر الإدارة وديما نشوفو يوقف مع الأمن الجامعي ويفدلك معاهم ويقسم معاهم السواقر .

الحثالات هاذي الكل اللي عرفتها واللي كل واحد منهم كان سبب في خراب تونس ونهبها وتطويل فترة حكم الطاغية ما نحبش انا كمواطن تونسي بعد الثورة نشوف خلقهم المقلّبة تحكم في بلادي .. وهاو جايهم قانون تحصين الثورة لما يخليهم يعوموا في الناشف ويمسحوا شواربهم ، هذا غير العدالة الانتقالية اللي باش تكشف ملفاتهم وسرقاتهم وتجاوزاتهم وتجسسهم على الشعب التونسي ومحاربتهم للدين والمصلّين والمتحجبات ..وقتها كان ما يباتش السبسي كمال اللطيف والعصابة متاعو في قلبو مانتسماش ولد تونس وولد الثورة .

نقله أدمين 1
بتصرّف