تونس : 41 حالة طلاق يوميا..

كتب أمير سعداوي
تونس : 41 حالة طلاق يوميا..
رقم مفزع ،لكن تلك هي نتيجة زواج المصالح والتسرع في إختيار شريك الحياة في دولة لا تحترم مواطنيها وفي واقع إجتماعي مزري طغت عليه المحسوبية والسرقة والفساد حتى أصبحت مجموعة من العائلات المعروفة بمختلف الجهات تتحكم في مصير دولة وفي إقتصادها الوطني و تتحكم في مصير أبنائها ...

نعود لموضوع الزواج وإرتفاع نسب الطلاق ، لو تعرفت على بنت وأحببتها وأحبتك وكلنا مررنا بتجربة دون حسابات ولا مصالح وطمع وما إلى ذلك ، عندما تتقدم إليها تسأل " من أما عائلة انت !?" (من عائلة الديناصورات اللي انقرضوا ) ، أول شيء يخمموا فيه من المدينة والا من الريف !? شنوا تخدم !?وكان لطف بيك ربي لا تسأل هل تملك منزل ملك أم لا .. الخ شروط تعجيزية ، كبر وعلو وعنصرية مقيتة ، عائلات تدمر كل العلاقات اللي تبنات عن حب وإنسجام ومشاعر وأحاسيس صادقة ، حتى تدرك بأن البعض لقبهم اللي يعرسهم " في الأخير الطفلة تتلز تقبل باش تتزوج زيجة المصالح اللي ما تدومش برشا وإن دامت كل حد يعيش على روحو والفاهم يفهم ... والراجل كيفكيف يتلز يتزوج زواج تقليدي بعد ما خسر حياتو وعمرو يحلم باش يتزوج حبيبتو اللي عشقها وحبتو وكانوا صادقين مع بعضهم ..قداش دمرتوا شباب ، قداش تسببتوا في تدمير عائلات وحرمتوهم من السعادة والعيش الكريم ، قداش عنصريين ما أخيبكم ، خليتوا برشا شباب ينقم عليكم ويطيب لغيروا كي الشهيلي وبعد تنتهي العلاقة أو الزواج بكارثة إجتماعية أو طلاق يدمر أحدهما أو كلاهما .. صحيح أنا مع عدم التسرع ، لازم العائلة تسأل على أصل الرجل وما تعطيش بنتها للي يجي .. لكن فما مينيموم من الشروط وإن توفر بعضها كالأخلاق والسيرة الطيبة والإستقرار المهني .. فعلاش الرفض على أساس فئوي ، طبقي ، جهوي ، عنصري مقيت ...

هذا سبب من أسباب إرتفاع نسب الطلاق في تونس وهنالك أسباب أخرى سببها هذا السبب ، بما أنو زواج مصالح دون حب فسيسقط كلاهما في مستنقع الخيانة وما إلى ذلك ...

حكيت في العموم وما نحبش نحصر المسألة في جهة من الجهات المعرفة بالشيء هذا أكثر من غيرها كي لا أتهم بأني فئوي ، طبقي أو عنصري ..