يكثر خير عم الحاج

البارح في الخدمة، فزعونا بعد الظهر قالولنا براو روحو لا تهزكم العاصفة إلي جاية في الثنية. لحقيقة ما كنتش مل العاكسين هزيت شلاڨاتي و ملاڨاتي و لميت أدواتي و روحت للدويرة. و آنا مروحة، حليت الراديو في الكرهبة: شوية غناء على شوية كلام فارغ، الحاصل شي على حكاية العاصفة. "زعمة الإدارة تخلوض؟! هو ما ثم شي؟!!!"

في الدار حليت التلفزة، حطيت تونس سبعة، مسلسل مصري يرقد و جمل مفيدة متع أخبار عاجلة:

"عم الحاج، قرر بش يبعث مساعادات للمنكوبين متع الفياضانات"

"عم الحاج ينصح بش يعملو فريق خاص للإسعاف"

"عم الحاج قرر بش يوقف العاصفة عند حدها"

"وزارات الداخلية و الصحة طلبو الإذن من عند عم الحاج بش يتدخلوا" هو في الحقيقة عم الحاج، جاب ربي سمحلهم بش يتدخلوا لإسعاف المواطنين المنكوبين - و ما نعرفش علاش مسمينهم منكوبين، زعمة على خاطر تعرضوا لكارثة طبيعية مؤقتة و إلا على خاطر عايشين تعاسة يومية -

الحاصل قداشو ناس طيبة هذا سي عم الحاج، ربي يخليهولنا، كان موش هو ما نعرفش شنوة ينجم يصير فينا!!

و ان شاء الله ديما إلي يحب يعمل الخير في تونس، يشاور قبل عمنا الحاج عملا بالمثل الشعبي التونسي "إلي يعمل الخير ما يشاورش... آه سامحني يشاور عاد"

"عم الحاج يوصي بتوخي الحيطة و الحذر الدائم"


يعني في حالة طوارئ، موش يلزمك تبع procédure كاملة و إلا تطلب رقم معين مجعول خصيصا للحالات هذي. آه مالا شنوة يلزمك تعمل. يلزم كيف تبدى ماشي في الثنية و تجيك العاصفة تحل عينيك مليح مليح بش تفنتي بالأشياء الطايرة إلي تنجم تدمغك، و ترد بالك لا تلبس بوتو متع ضو، يلزم تدرد بالك مليح مليح لا تطيح في روڨار.


الحقيقة بيني و بين روحي، قعدت نتسائل: زعمة علاش ما عندناش procédure (تكون مخدومة من قبل) معينة ينشرها الإعلام و المعهد الوطني للرصد الجوي من قبل لا تصير الكارثة، زعمة هذا ما ينقصش من عدد الضحايا. و علاش وزارة الصحة ما تعملش فريق طوارئ خاص بالكوارث الطبيعية يكون متكون من مرشدين يتم الإتصال بيهم عن طريق الهاتف و من أطباء و من رجال الاطفاء و غيرهم إلي يكونو مستعدين وقتلي يتم الإعلام بحدوث كوارث طبيعية. علاش ديما نستناو آخر آخر لحضة بش نتحركوا "بعدما اتخذ شرى مكحلة"

قداش منو عم الحاج مسكين، لاهي بمشاكل تونس الإجتماعية و لاهي بالكارثة الإقتصادية بش يزيد يخمم في حلول للكوارث الطبيعية.

إيه !ما وحدك وحدك كي الرجال قدم إقتراحك لعم الحاج و هو أكيد تو يوافقلك عليه، أما من بعد ما تتغشش كيف في الأخبار العاجلة تقرى إلي "عم الحاج لقى الحل للكوارث الطبيعية" ؛)


منقـول

صح لينا ..عندنا عم الحاج..